مع نايا لاب Visualising Spaces

July 14, 2021 - Ramy Khorshed & Hussein El Kheshen

 في سلسلتنا الجديدة بنقابل اهم المصممين في مصر عشان نعرف منهم و نقولكم ازاي بيقدروا يخلقوا تواصل مع المساحة اللي هيكون فيها البيت ، و كمان ازاي التصميم هو جانب أساسي من انك تحس ان البيت بيتك.  

في أول جزء من السلسلة٬ اتكلمنا مع "نايا لاب" اللي قاموا بتصميم اماكن مميزة جدًا زي "زوبة"  و "9 بيراميدز لاونج" عشان نعرف منهم اكتر عن اختصاصهم في التصميم و الهندسة المعمارية.

الفضل ورا وجود "نايا لاب" كان ياسمين حمزة و ندي شلبي، و عشان كده قابلناهم و عرفنا منهم ازاي تقدر تختار و تعيد تصميم بيتك.

تصميم نايا لاب

ازاى تعمل ميزانية مناسبة لتصميم بيتك؟

تختلف الميزانية حسب تفضيلات العملاء، سواء بسيطة، متوسطة، أو فاخرة. و مع ذلك، لما تيجي تعمل ميزانية لتجهيز بيتك الجديد في ٣ جوانب مهمة لازم تراعيها وهي التصميم، و المقاولات، و الاثاث و الكهرباء.

١- التصميم: هتعين مصمم؟ لو اه، يبقى السعر هيتوقف على مساحة البيت و خبرة المصمم، و التكلفة بتتراوح بين ٥٠٠ إلى ١٠٠٠ جنيه للمتر. و بنوصيك تتأكد ان المصمم بيقدملك "الباكدج" الكاملة اللي بتتضمن كل الرسومات و اللي بيتم تقديمها للمقاول لضمان دقة التنفيذ. أو كمان ممكن تحدد الميزانية للمصمم من البداية و هو يشتغل على أساسها، لكن للاسف ساعات ده ممكن يخليك تحتاج تستعين بمصادر خارجية و اللي ممكن تكلفك أكثر من اختيار الباكدج الكاملة أو يحصل أخطاء في التنفيذ.  

٢- المقاولات: المقاولات بتتضمن كل شيء متعلق بالتشطيبات، من التكييف و الكهرباء و السباكة و مواد التشطيب و كل ما يتعلق بالبناء. عادة بتكون التكلفة للبنية التحتية زي التكييف و الكهرباء و السباكة هي الاعلي. المقاول الموثوق فيه غالبًا هيكلفك حوالي ٤٠٠٠ جنيه للمتر للمساحات السكنية أو ١٢٠٠٠ جنيه للمساحات التجارية.

٣- الأثاث و التركيبات و الكهرباء: و ده بيشمل أي مشتريات إضافية متعلقة بالمقاولات، على سبيل المثال فيش الكهرباء، و دول ممكن يتم دفع تكاليفها ضمن الاتفاق أو استبعادهم حسب تفضيل العميل.

إيه العلامات اللي تخليك تعرف ان البيت محتاج اعادة تصميم؟

إعادة التصميم ممكن تتعمل لأي بيت، لكن مهم تطلب "خطة البناء" عشان تقدر تعرف اماكن الهياكل اللي مينفعش تتنقل او تتغير زي اعمدة الاساسات و دي مش هتقدر تعرف اماكنها من غير خطة البناء، غير بقى لو عايز تكسر البيت كله…

ايه الحاجات اللي لازم اعمل حسابها لو هشتري شقة في بيت قديم؟

اهم حاجة لازم ناخد بالنا منها هي الكهرباء و السباكة. و بننصح جميع المشترين انهم يتأكدوا من قوة اساس المبنى وعدم وجود أي مشاكل في البنية التحتية قبل اتخاذ أي قرارات.

تصميم نايا لاب

ايه اللي لازم ادور عليه في بيت المصيف؟

البنية التحتية و الشبابيك و الابواب الجيدة. من الافضل ان البيت يكون في اتجاه الشمال "بحري" عشان التهوية تبقي احسن. عادة تعتبر بيوت المصيف اللي بتطل علي البحر افضل من اللي بتطل علي حديقة، و ده اللي بيخلي قيمة البيت اعلي.

ايه الحاجات اللي المفروض نعملها او مانعملهاش في إعادة تصميم البيت؟

حاجات المفروض نعملها: دايمًا استشير المتخصصين سواء المقاول أو المصمم عن أي تغييرات هيكلية عايز تعملها. اعادة استخدام أو تجديد الاثاث اللي موجود والاكسسوارات المنزلية مش مكلف بدرجة كبيرة.

حاجات المفروض منعملهاش: متاخدش أي قرارات من غير ما تدور كويس و تكون محدد ميزانية واقعية و واضحة.

تصميم نايا لاب

اعمل ايه لو مفيش اضاءة طبيعية كفاية في البيت؟

لو مفيش اضاءة طبيعية يبقى من الأفضل اختيار لون فاتح للأثاث والجدران. دايمًا استخدم الضوء الأصفر، و استخدم الأضواء المخروطية لتقليد الضوء الطبيعي و توزيع الاضاءة بشكل جيد.

تصميم نايا لاب

ازاي اخلي الغرفة شكلها اكبر و اوسع؟

الكراكيب بتخلي شكل المكان اضيق بكتير من الحقيقي. استخدام الألوان الغامقة و الاثاث الكثير بيقلل الإحساس باتساع المكان، ف من المهم استخدام ألوان فاتحة و وضع كمية مناسبة من الضوء الدافي اللي بيخلي الغرفة تبدو اوسع و اكبر.

تصميم نايا لاب

ايه اكتر غرفة في البيت المفروض تاخد اعلى جزء من الميزانية؟

طبعًا كل شخص عنده تفضيلات مختلفة، و لكن من الافضل تخصيص الجزء الأكبر من الميزانية للاماكن اللي فيها شغل كتير زي المطبخ و الحمامات. اتأكد ان يبقي عندك أعلى جودة البنية التحتية و التشطيبات و الأجهزة في المكانين دول تحديدًا. و بشكل عام، في تصميم أي بيت من الضروري الاستثمار في بنية تحتية تضمنلك انها تعيش معاك اطول فترة ممكنة.

تصميم نايا لاب

ازاي اقدر احس ان البيت بيتي؟

١- اختيار اكسسوارات و ديكورات مناسبة.

٢- استخدام خامات طبيعية و دافئة.

٣- اضافة لمسات من التراث بتخليك تحس بانتماء و دفء اكتر.

٤- الوصول لأعلى درجات الراحة في المكان والاهتمام دايمًا بوجود الراحة دي.

٥- اختار الالوان المناسبة. مهم يكون عندك لون مختلف في بعض الاماكن في البيت، بس كل ما كانت الألوان و الخامات المستخدمة مترابطة اكتر كل ما كانت مريحة اكتر للعين.

٦- استخدم الضوء الأصفر الدافئ للحصول على تأثير مريح، و وزع الضوء بشكل جيد عشان الاضاءة متكونش زيادة عن اللازم.

٧- الخامات الطبيعية هي الأفضل من حيث الراحة و الإحساس بالدفء.

شارك عبر