مع افرشليVisualising Spaces

September 01, 2021 - Ramy Khorshed & Hussein El Kheshen

في ساكنين٬ بنكون عارفين ان قيمة البيت مش بس في سعره. في سلسلتنا الجديدة “Visualising Spaces” بنقابل اهم المصممين في مصر عشان نعرف منهم و نقولكم ازاي بيقدروا يخلقوا تواصل مع المساحة اللي هيكون فيها البيت ، و كمان ازاي التصميم هو جانب .أساسي من انك تحس ان البيت بيتك.  اضغط علي اللينك عشان تقرا المقابلة كلها

فى تاني جزء من السلسلة, قعدنا و اتكلمنا مع "أفرشلي" علشان نفهم منهم ازاي نعمل تصميم مميز لبيوتنا و ازاي نفرشهم بطريقة مختلفة و عصرية. "أفرشلي" هما مجموعة من المصميين والمبرمجين اللي بيشتغلوا مع بعض و بيصمموا ديكورات و فرش للبيوت باسعار مناسبة. "أفرشلي" بيساعدكم تتخيلوا شكل العفش اللي هيكون فى بيوتكم وبيخلوا تصميم البيوت سهل و مسلي فى نفس الوقت. عكس كل الشركات اللي بتقدم خدمات تصميم كاملة للبيوت, "أفرشلي" هدفهم انهم يساعدوكم تخلوا بيوتكم تعبر عنكم بأكبر طريقة ممكنة.

التصميم بيبدأ أزاي؟ بيبدأ بشراء العفش ولا بدهن الحيطة؟

التصميم بيبدأ باصحاب البيوت, بالحاجات اللي بيحبوها و باحتياجتهم و طريقة معيشتهم. من هنا بنخلق فكرة عامة نمشي وراها و على أساسها بنبدأ التصميم.

أيه هي أكبر التحديات اللي بتواجهوها و أنتوا بتفرشوا اي بيت؟

العملاء بيحبوا يشتروا العفش من أماكن متفرقة, التحدي بيبقي ان كل قطعة عفش تبقى لايقة مع التانية و ان يكون فى تناسق بينهم. الموضوع بيحتاج فهم للمواد المكونة لكل حاجة و لنوع الأقمشة و لتناسق التصميم. فى انواع عفش كتير بتبقي مبنية على بعض فلو عامل معين اتغير او اختل ده هيأثر على باقي العوامل.

إزاي الواحد يقدر يضمن ان التصميم بتاع بيته يكون منسجم مع بعضه؟

فى عوامل كتير بتضمن التناسق. أهم أتنين منهم
أ) ان يكون فيه فكرة عامة للتصميم و ده اللي بيحدد الألوان و الأشكال اللي هنستخدمها فى ملئ المساحات اللي عندنا
ب) التوازن فى ملئ المساحات فى البيت بحيث ان عملية الفرش تتم بطريقة متناسقة و مريحة للعين.


الفكرة العامة أو المبدأ اللي التصميم قايم عليه هيساعد اننا نحدد الشكل اللي عايزينه للتصميم. على سبيل المثال هل العميل بيحب المساحات الطبيعية و الألوان المحايدة ولا بيفضل الألوان الفاقعة؟ هل بيفضل المساحات تكون واسعة و مريحة للأعصاب و لا تكون مليانة عناصر؟ بمجرد ما بنحدد الفكرة العامة للتصميم كل حاجة بتبقي سهلة و بنقدر نعرف ايه العناصر اللي ممكن نستخدمها اكتر من مرة فى المساحة اللي عندنا سواء كان لون او نوع قماش مثلا و من هنا بنقدر نحقق الانسجام.

التوازن من أكتر الطرق اللي بتحقق تناسق فى المساحات الفاضية اللي محتاجة تتفرش, وده علشان التوازن بيحدد ازاي عنينا بتتحرك و بيريحهم لما الفرش يكون لايق على بعضه. المفتاح فى ان مايبقاش فيه مساحة زحمة او مليانة عناصر أكتر من مساحة التانية. ماينفعش حاجة فى العفش تبقى طويلة جنب حاجة تانية قصيرة, ماينفعش يبقى فى ناحية فى البيت تبقى مليانة ديكورات و ناحية تانية فاضية, الموضوع ببساطة هو محاولة إيجاد إيقاع فى المساحات الفاضية اللي عندنا.

أيه اكتر الأمكان اللي الواحد ممكن يستمد منها إلهام لتصميمات البيوت؟

الطبيعة و السفر مصادر رائعة للإلهام، زي ما احنا شايفين قدامنا  الطبيعة مليانة أشياء و ألوان متناسقة مع بعض و ممكن جدا تلهم تصميم البيوت. بنعتقد ان البيئة اللي حوالينا و شعورنا بالامكان اللي احنا فيها ممكن برضه يكون مصدر إلهام. يعني فى مصر, الإلهام و الأبداع دايما بيبقي فى المصنوعات اليدوية. أحنا بنحب ندخل عناصر من البيئة المصرية فى التصميمات اللي بنعملها, عناصر زي الكليم و البلاط المدهون يدوي و الفن الشعبي. أحنا بنعتقد ان أفضل التصميمات هي اللي فيها حس للمكان و اللي بتعكس البيئة اللي طالعة منها.

اتعتقد ان الواحد ممكن يعمل تغييرات بسيطة بشكل مستمر و ان ده أفضل من تغيير شامل كل كام سنة. لما تشتروا حاجات بتحبوها مش مجرد حاجات عليها خصومات أو طالعة موضة, هتحبوا تعيشوا معاها لفترات أطول. ده بالذات فى قطع العفش الضخمة, لازم الواحد يتأكد انهم هيعشوا معاه أطول فترة ممكنة. يعني مثلا ترابيزة سفرة خشب اشتريتوها علشان بتحبوها غالبا هتعيش معاكم لفترة طويلة و ممكن كمان تحبوها أكتر كل ما تقدم. ممكن بس تغيروا حاجات بسيطة زي الكوشينز أو الأكسسورات, و مع الوقت هتشتروا حاجات أكتر و هيبقوا جزء لا يتجزء من قصة حياتكم.

ايه النصايح اللي بتدوها علشان التصميمات تعيش العمر كله على الرغم من الموضات الجديدة اللي ممكن تطلع؟

أهم حاجة ان الأساسات تكون محايدة. أحنا بنفضل الخامات الخفيفة والطبيعية زي الخشب الطبيعي, الرخام الطبيعي, الأقمشة و بنفضل الألوان تكون محايدة. لازم العفش يكون عملي و مش بس شكله حلو. يعني مثلا لو عندكم أطفال ماينفعش تشتروا كنبة لونها أبيض! لو بتستخدموا ترابيزة للقهوة بشكل مستمر, هاتوها خشب صلب بحيث انها تتحمل الاستخدام الكتير.

التصميمات اللي بتخليكم تحسوا بالراحة و الألفة هي التصميمات اللي هتعيش. علشان كده الطبيعة دايما هي التريند.الأشكال الطبيعية و النباتات بيخاطبوا احتياجنا للهروب من الضغوطات و بيساعدونا نتواصل مع الطبيعة.

التصميمات اللي قايمة على مواد متجددة هتعيش كتير. فى مصر استخدام المواد المتجددة بدأ يزيد خصوصا مع الأتجاه العالمي للحفاظ على البيئة.

بما أن العالم بقى معقد أكتر من الأول و كل يوم التعقيد بيزيد الكل بقى بيدور على قصص ليها معنى علشان يحكيها. علشان كده التصميمات المميزة و القطع الفنية الأصلية و الأكسسورات اللي بنشتريها و أحنا مسافرين بقوا جزء مهم من بيوتنا.


ايه موضات التصميم اللي راحت عليها؟

الديكورات التراثية التقليدية ابتدت تبقي موضة قديمة و الناس زهقت منها و كله بيدور على ديكور تراثي بس بشكل مختلف, المكرميات التقليدية محتاجة تصميمات جديدة. المساحات الخالية بالشكل العصري برضه مابقتش منتشرة و كله بيدور على مساحات فيها حميمية أكتر يقضوا فيها وقتهم.

هل ممكن العفش يخلى الأوضة تبان أكبر من مساحتها؟

أه أكيد! دي واحدة من أهم مميزات التصميم الجيد. اختيار العفش المظبوط و ازاي نفرشه فى المساحة ممكن يخلي مساحة الاوضة أوسع من حقيقتها.

شوية نصايح لتصميم مساحة صغيرة:

استخدام قطع عفش كبيرة و قليلة هيخلي مساحة الأوضة تبان أوسع أكتر من لو استخدمنا قطع عفش كتيرة. استخدام كنبة على شكل حرف ال ل أفضل من استخدام كراسي كتيرة. برضه فكرة ان العفش مايكونش محطوط على سطح الأرضية بيعمل إيحاء المساحة أوسع. يعني مثلا استخدام كنبة ليها رجلان طويلة أو تعليق التليفزيون على الحيطة هيساعد بشكل كبير ان المساحة تبان أكبر.


استخدام حاجات ممكن تتعلق على الحيطة لغاية السقف زي رفوف الكتب أو الكباين ممكن يخدع العين و يبين ان الحيطان أطول من الحقيقة.

و طبعا الخدعة المعروفة واللي هي استخدام المرايات. المرايات بتساعد ان مساحة الأوضة تبان أكبر و بتنشر النور فى الأوضة اكتر.

العفش اللي متصمم مخصوص و لا العفش جاهز؟

كل أنواع العفش ممكن تصمم مخصوص أو تتجاب جاهزة،  فيه مميزات و عيوب للأتنين. مصر مليانة حرفيين مستقليين اللي ممكن ياخدوا صورة قطعة عفش من على الأنترنت و يعملوا زيها بالظبط.

العفش المصنوع مخصوص يبيدوكم الفرصة انكم تجيبوا قطعة العفش اللي حبينها بالظبط, الموضوع بياخد وقت طويل و بيحتاج فهم جيد لأبعاد قطعة العفش و المواد المستخدمة فى تصنيعها. في مفاجأت كتير ممكن تظهرلكم لو اختارتوا تصنعوا العفش بتاعكم. الأبعاد الغلط ممكن تخلي قطعة العفش شكلها غريب و مش لايق على المساحة اللي عندكم. لو انتوا حابيين تصمموا العفش بتاعكم اعملوا كده فى قطع العفش الخفيفة و الصغيرة زي الرفوف و الترابيزات الصغيرة, لكن خلى بالكم من تصميم كنبة مثلا علشان فيه حاجات كتيرة غلط ممكن تحصل.

بالنسبة للعفش الجاهز الموضوع ممكن يكون أغلى أكيد بس الشركات الكبيرة و البرندات دايما بتبقى حريصة ان تعمل رسومات و نماذج كتيرة للعفش بتاعهم و بيحرصوا ان منتجاتهم تكون مطابقة للصور الموجودة فى الكتالوج عندهم، ممكن تشوفوا بعيونكم قطعة العفش نفسها قبل ما تشتروا علشان تعرفوا هتبقي عاملة أزاي لو استخدمتوها فى بيوتكم.

من وجهة نظركم, ايه اللي بيخلي البيت أكتر من مجرد مسكن؟

كل ما تحس ان البيت فيه طبقات أتعملت و أتكونت مع الوقت كل ما يكون أكتر من مجرد مسكن. أنكم تحسوا بالراحة فى المساحة اللي أنتم عايشين فيها. الإضاءة الهادية, السجاجيد, ده غير الديكورات زي اللوحات أو براويز الصور, كل ده هيساعدكم أنكم تحسوا ان البيت بتاعكم جزء منكم و من شخصيتكم.

شارك عبر