Visualising Spaces مع Alchemy

١٠ أكتوبر ٢٠٢١ - Nazli Kassem

في ساكنين٬ بنكون عارفين ان قيمة البيت مش بس في سعره. في سلسلتنا  “Visualising Spaces” بنقابل اهم المصممين في مصر عشان نعرف منهم و نقولكم ازاي بيقدروا يخلقوا تواصل مع المساحة اللي هيكون فيها البيت ، و كمان ازاي التصميم هو .جانب .أساسي من انك تحس ان البيت بيتك.

فى تالت حلقة من سلسلتنا، قعدنا و أتكلمنا مع "كريم مختيجيان"، واحد من مؤسسين Alchemy Design Studio، عشان نتناقش معاه في معني كلمة الفخامة و في إزاي نخلق مساحات فخمة نعيش فيها بصرف النظر عن الميزانية.إلتزاماً بفهم احتياجات ونمط حياة العملاء بتوعهم، Alchemy اشتغلوا فى مشاريع سكنية و تجارية كتيرة و اتميزوا بقدرتهم على خلق تجارب مختلفة و جديدة من خلال تصميماتهم.

سكن خاص من تصميم Alchemy.

١.ايه اللي ممكن يخلي اي بيت يتوصف انه "فخم"؟

البيت الفخم مش شرط يكون متكون من مواد خام غالية. أنا على المستوى الشخصي باشوف إن الفخامة فى قد ايه الحاجة أصلية وليها فايدة ،ازاي البيت يتكون من حاجات بسيطة و شيك و فى نفس الوقت بتخدم المكان و الأشخاص اللي عايشين في المكان. لما اخش بيت متوفرة فيه العوامل ديه، انا كده باعتبره بيت فخم. أكيد برضه ممكن البيت يكون فيه مقتنيات تمنها غالي زي لوحة فنية أو تمثال حجري مميز. الحاجات برضه اللي ليها خلفية تاريخية ممكن تضيف فخامة. يعني لو جبت حجر من بيتي و حجر من سور الصين العظيم، اكيد الحجر اللي من سور الصين العظيم هيضيف قيمة أعلى للبيت.

سكن خاص من تصميم Alchemy.

٢. لو فيه شخص عايز بيته يكون فخم بس مافيش ميزانية كبيرة معاه، ممكن يحقق ده إزاي؟

الفخامة مش مرتبطة بشكل كبير بتمن الحاجات والفلوس. لكن مرتبطة اكتر بالاناقة، نسب استخدام المواد، اختيارات المواد، الوضع النهائي للحاجة فى المكان و هكذا. اللي بيفرق فى الأخر هو الحاجات لايقة على بعضها و لا لأ.

أحسن طريقة لتحقيق الفخامة من غير ميزانية كبيرة هي استخدام مبدأ الحد الأدنى.

ممكن مثلا فرش الأرضية مايكونش غالي لكن الخامة و تقطيعها يكونوا مناسبين، ساعتها ممكن كنبة واحدة غالية و شيك هتبقي كفاية.

الإضاءة و الجو العام من الحاجات التانية المهمة. خلق جو عام مميز ٧٠٪ منه بيكون بإستخدام إضاءة ملائمة. لو مافيش إضاءة مظبوطة يبقي مافيش تصميم داخلي مظبوط. ممكن الواحد يصرف ملايين على الديكور بس من غير الإضاءة الصرف ده مالوش لازمة. الإضاءة واحدة من أهم عناصر الديكور.

سكن خاص من تصميم Alchemy.

٣. إيه اكتر المواد الخام و الأنسجة اللي بتدي شعور الفخامة فى البيوت؟

المواد الخام اللي مش من صنع الإنسان و اللي موجودة فى الطبيعة. حاجات زي الصخور و المعادن و الرخام و الخشب.

بالنسبة للانسجة فالفخامة بتيجي من التناقض اللي بين المواد الناعمة و المواد الخشنة زي مثلا الاخشاب. شعور الفخامة بيتحقق لما كل حاجة تبقي متناغمة مع التانية. شعور النعومة و الخشونة مع بعض بيساعد انه يخلق شعور عام جيد خصوصا لو المواد جاية من الطبيعة.

سكن خاص من تصميم Alchemy.

٤. إيه هي اكتر الألوان اللي بتحقق شعور الفخامة فى البيوت؟

اللون الذهبي بيعتبر لون مقدس وروحاني. اللون الفضي و البرونزي كمان. بس الموضوع مش بس فى اللون نفسه لكن كمان نسبته و ازاي ممكن تستخدمه. التوزان ده بيتحقق لما بتربط بالقصة اللي العميل عايز بيته يحكيها. الشخص اللي هيعيش فى البيت هيعيش فى المساحة ديه فترة كبيرة من حياته علشان كده من خلال الديكور انا بحاول اخلق تجربة حياتية تساعده انه يكون نشيط و مبدع فى حياته اليومية. الحاجات اللي فى البيت لازم ماتكونش مربوطة بفترة زمنية معينة والا هتبقى قديمة مع مرور الوقت. لازم برضه تكون محايدة علشان اللي عايش فى البيت يتكيف عليها و على وجودها. الناس بطبعها بتحب التغيير. كلنا بنتغير و مشاعرنا بتتغير، البيئة اللي حوالينا لازم تدعم التغيرات بتاعتنا. لو انا صممت بيئة ليها شكل او إطار معين ثابت الشخص اللي عايش فيها هينعزل عنها. الواحد لازم يعيش فى مساحات فيها حرية و مش متقيدة عشان يقدر يحس بحريته.

٥- إيه هي أفضل الأنماط  اللي ممكن نختارها في الديكور؟

بالنسبة ليا الأنماط بتعتبر لغة. الموضوع بيتعمد على القصة اللي بيحكيها البيت، و اذا كان البيت محتاج نمط او شكل معين عشان يحكي القصة، ممكن يكون نمط إسلامي أو نمط اوروبي أو أي نمط تاني، أنا باشوف الأنماط لغة تصويرية.

الفخامة مش في اختيار نمط محدد للديكور لكن فى ازاي بيتقدم النمط ده و كمان فى المكان اللي بيكون محطوط فيه. ممكن يكون متصمم على الحيطة، محفور فيها، أو حتي ضوء معروض عليها. طريقة عرض اي نمط هي اللي بتعكس تميزه.

سكن خاص من تصميم Alchemy.

٦. ازاي ممكن نوازن بين الفخامة والراحة والفعالية؟

الفخامة والراحة والفعالية بيتحققوا لما المواد الخام المستخدمة تكون طبيعية و أصلية.

٧. إيه اكتر الحاجات الملهمة لتحقيق ديكور مميز؟

شخصيًا انا بلاقي الإلهام في كل حاجة. في الشوارع، في الناس اللي بقابلها كل يوم. لازم تكون ملاحظ كل حاجة حواليك، بتشوف و تحس كل حاجة حتي الحاجات اللي شكلها قبيح.

المجتمعات الشعبية و حتى العشوائية حقيقية جدًا. هي ديه الحياة اللي بجد، الناس بتعيش كده، بالنسبة ليا الحقيقة ديه مصدر إلهام. الأدب، الشعر، الأفلام، كل دول مصادر إلهام بالنسبة ليا.

بس برضه الموهبة والشغف وإن الواحد يكون مبدع مش كفاية عشان تستغل الإلهام بشكل مظبوط. انا درست في مدرسة عشان اتعلم ازاي اكون مبدع. لازم الواحد يدرس و يتعلم ازاي يستغل الموهبة عشان ينتج إبداع. الإبداع هو طريقة تفكير محتاجة تطور بشكل مستمر و الواحد لازم يكون متدرب انه يطور طريقة التفكير ديه. الموضوع مش دايمًا تفكير بره الصندوق، لو اضطريت يبقى ممكن تفكر جوه الصندوق بس برضه خليك مبدع. اي حد محتاج يتدرب كل يوم انه يفكر بشكل مختلف ولازم يستخدم أساليب وتقنيات معينة عشان تطلع بأفكار جديدة. في ناس كتيرة عندهم موهبة فطرية بس ماعندهمش إلتزام او ماعندهمش حرفة. و في ناس تانية اذكياء جدًا بس مش موهوبين و العكس.

٨. إيه اكتر عامل مهم في تصميم غرفة معينة؟

اهم عامل هو الشعور اللي عايز العميل يحس بيه في الأوضة و إزاي يستخدم كل حواسه عشان يوصله الشعور ده. لازم اعرف مين هيعيش فى الغرفة ديه و بناءًا على ده اعرف ايه اللي هيساعدهم يعيشوا حياتهم و يطوروها بشكل أفضل. ايه اكتر مساحة هما محتاجينها و محتاجينها ليه؟ و حتي بفكر في هما بيحبوا إيه؟

سكن خاص من تصميم Alchemy.

٩. إيه اكتر غرفة لازم يتخصصلها أكبر جزء من الميزانية؟

المطبخ و الحمام.

المطبخ مهم جدًا وبنستخدموا كل يوم.

الحمامات برضه بنستخدمها كل يوم. فايدة الحمامات مختلفة و لازم تحقق بشكل سليم. أنا شايف إن الفخامة الحقيقية في الحمامات.

برضه اي حاجة جسمك هيستخدمها اكتر من أربع أو خمس ساعات كل يوم لازم تستثمر فيها من الميزانية، ده ينطبق على حاجات زي الكنب و المراتب.

في بيوت كتيرة الكهرباء فيها بتتعمل بشكل غلط وده ساعات بيعمل تيارات كهربا و حقول مغناطيسية حوالين السرير وده شئ مضر جدًا.

شارك عبر