الفرق بين البيوت البحرية والبيوت القبلية

٨ مارس ٢٠٢٢ - Nazli Kassem

إحنا في “ساكنين” ملتزمين أننا نقدم ليكم كل المعلومات اللازمة علشان تاخدوا قرارات أحسن لما تيجوا تشتروا أي عقار. أفضل استثمار عقاري ممكن تعملوه هو الاستثمار اللي بيلبي احتياجاتكم و احتياجات عائلاتكم، علشان كده إحنا كفريق دايماً بنفكر في طرق متنوعة علشان نساعدكم تاخدوا القرار الصح. في المقالة ديه هنقول لكم عن الفرق بين البيوت البحرية والبيوت القبلية.


“بحري ولا قبلي؟” من أكتر الأسئلة الشائعة اللي بيسألها أي حد عنده النية أنه يستثمر في بيت. الغرض من السؤال بيكون معرفة اتجاه الهواء وتحديد أنهي عقار بيمر فيه نسيم هواء اعلي. من المتعارف عليه أن الاتجاه البحري هو اللي بيمر عليه الهواء بشكل أكبر من الاتجاه القبلي. البيوت البحرية بتكون درجة الحرارة فيها أقل من البيوت القبلية بسبب التهوية الطبيعية اللي بتحصل جواها، على الناحية التانية البيوت القبلية بتكون الحرارة فيها اعلى ومكتومة بسبب أن الهواء الطبيعي مش بيدخلها بشكل كبير. علشان كده البيوت البحري يتفاوت سعرها وفي معظم الأحيان بيكون سعرها أغلي من البيوت القبلية.

البيوت القبلية على الناحية التانية ليها بعض المميزات وده لأن الشمس بتدخلها بشكل أكبر بسبب أن الشمس بتتحرك من الشرق للغرب وبالتالي بتكون عمودية على الواجهة الجنوبية (القبلية). ده ممكن يكون مش مفيد في فصل الصيف بالتأكيد لكنه بيكون مفيد في فصل الشتاء لأنه بيساعد في موازنة درجة الحرارة بسبب أشعة الشمس اللي بتقتحم البيت وبترفع درجة الحرارة وبتسبب نوع من الدفئ.


السبب الجغرافي أن الشقق البحري ممكن تكون أفضل و بيعدي فيها الهواء الطبيعي بشكل أكبر هو أن الاتجاه البحري هو أتجاه الشمال و أتجاه الرياح الطبيعى دايماً بيكون من الشمال للجنوب. في مصر اتجاه الشمال الغربي هو الأفضل وده بسبب أن نسيم الهواء الطبيعي المنعشة بيكون مصدرها البحر المتوسط وأوروبا واللي متواجدين في الشمال الغربي.

السؤال هنا بيبقى كيفية تحديد إذا كان البيت بحري ولا قبلي. لو المعلومة ماكنتش متوفرة، فيه طرق كتيرة لتحديد البيت البحري بنفسكم. أسهل طريقة لمعرفة كده هو معرفة قبلة الصلاة. ده لأن القبلة في مصر هي في الاتجاه الجنوبي علشان كده لو البيت بحري هيبقى ضهركم في أتجاه الشارع أو البلكونة اما إذا كان وشكم في اتجاه الشارع أو البلكونة فده معناه أن البيت قبلي.


طريقة تانية لتحديد الشقق البحرية هو تحديد إتجاه الشمال من شروق الشمس. الطريقة ديه أصعب لأنها بتتطلب الذهاب لموقع البيت في ميعاد شروق الشمس. بتكون الشمس ساطعة من الشرق وبتكون عمودية على البيت، ده معناه انه بيت بحري.


في المدن الساحلية بيكون تحديد البيت البحري بشكل أسهل بكتير لأن ببساطة البيت البحري هو البيت اللي الاتجاه بتاعه بيواجه البحر بشكل مباشر.


أجر أو اشتري أو قدم طلب تمويل عقاري على بيت أحلامك الآن على سكنين.

شارك عبر